平靜 8月31日 星期五  

上星期公司出左一份內部通告,係有關員工嘅上班服裝,為求整體全公司嘅專業形象,首先女士們不得穿著性感,當中包括低胸衫&迷你裙(I love it),其實公司都有幾位有料之人著得起,不過以後都再冇機會見到喇......

到男士們喇,其實講男士就連女士都唔著得牛仔褲+波鞋,仲有唔可以穿著運動裝啦,汗衫都唔著得,一定要著有領有袖嘅T-shirt!

由於呢一份通告係總公司出嘅,所以全層嘅其士工程服務大樓都一定要遵守,起初見到呢份不知所謂嘅dress code,就真係搞到全公司滿城風雨,原本我地design department冇一個去遵守,後嚟其他department都開始著靚D之後,慢慢全公司都改頭換面了,其實就算著得體D,都唔會突然之間變得更專業啦~

後記: 勤勞應該不會要人的命，不過，我似乎不必冒這個險。

多雲 8月30日 星期四  

呢個禮拜因為有工程要趕趕趕,迫不得而要加班工作,尋晚好夜先返到屋企,仲要未食飯喎,原本諗住食少少算吧,因為一個鐘頭之後就要瞓覺,食飽飯又點會瞓得好呢,對身體實在冇益,但真係太肚餓喇,食完飯都仲未夠飽,再食多碗蕃薯糖水先啦,之後嚟多個食後果,咁就啱啱夠飽喇! 結果今日早多一個鐘頭返屋企,不過都已經係晚上十點幾喇,好快又要去沖涼瞓覺,之後又起身返工趕趕趕......其實公司唔止我一人係咁樣,同我同一個department嘅兄弟,過大半數都要加班,今晚我已經算係最早走嘅一個,到底公司係咪真係咁多嘢趕呢? 而有兩三位同事竟然每一晚都要加班,到底佢地係咪賣身比公司呢? 難說難說~

後記: 試問問朋友，有什麼人、什麼地方對他們影響深遠。他們談及往事，會提到改變一切的第一個吻、第一杯啤酒、第一份工作，談論間綻放著夏天的氣息。

雷公 8月28日 星期二  

今晚雖然有月全蝕欣賞大會,可惜工作太忙冇時間去,加上仲要去到西貢先有得睇喎,淨係搭車返屋企都夠我受啦......

所以一於留守公司,直至戰鬥到最後一刻,今晚公司最遲收工嘅人竟然係我,估都估唔到呢! 平日八九點公司依然燈火通明,好似係愈晚愈多人咁,我聽返Tender department嘅同事講,有時要開會開到零晨兩點幾,其實我都唔明白到底開咩會呀? 咁誇......不過事實始終係事實,公司project多而人手少,通常開完一個地盤會之後,就再要開另一個地盤嘅會議,仲有公司自己內部會議呢,諗下諗下又真係幾辛苦喎~

後記: Nobody wants to hear a celebrity complain. (誰都不愛聽名人抱怨。)

中雨 8月27日 星期一  

睇睇月曆,原來今日係初十五,再抬起頭來睇睇個天空,好似缺少左一樣東西,呢樣嘢就係月光喇......點解初十五會冇月光呢? 因為天上面實在太多雲喇,以而家咁嘅天氣,真係冇咩機會睇得見,雖然眼見雨已經停了,但係厚厚嘅烏雲層層疊疊,今晚睇唔到滿月真掃興呀! 尋晚過完鬼節七月十四,當然唔我過啦,雖然我人唔似人鬼唔似鬼,但唔多唔少都比較似個人,街上面有好多人都走去燒金銀衣紙,以前細個一定會跟埋阿媽落樓下,一路玩就一路食,童言無忌,鍾意點玩都得,鍾意講咩又得......不過而家再冇呢支歌仔唱嚕~

後記: I think I have a disease called spontaneous disclosure. I need to tell everyone my life story instantaneously. (我也許患了一種名叫自發暴露的病，要把自己的經歷馬上告訴天下人。)

雷陣雨 8月26日 星期日  

有時做運動去得太盡會有反效果,而呢種咁嘅反效果,將會係完完整整咁一個人承擔晒,痛楚當然要獨自忍受,其他人係冇辦法體會得到嘅,而且就連分擔會唔能夠存在,唯有自己諗一諗做咩先可以幫自己減輕痛楚!

近排運動量大大咁增加,加上自己本身又去得太盡,完全都冇意識咁去收制,好似尋日去跑馬地踢波踢足兩個鐘頭,今日見好天就去游水,諗住落水底好好咁休息一下,所有嘅運動結束之後,慢慢咁全身嘅肌肉就開始向我投訴喇,首當其衝嘅係右手臂,當我將右手高舉嘅時候,就會開始感到疼痛,而最痛之時就係伸直晒隻右手......之後就係右大腿,無論行行企企跑跑跳跳,都一定係忍忍作痛,運動初期只係感到輕微疼痛,但係當時間一長就會劇痛起嚟,直到我忍無可忍嘅時候就會比自己停低......到休息一晚之後,真真正正嘅地獄痛苦正式開始~

後記: Lust is easy. Love is hard. Like is most important. (情欲來得容易，愛情則困難重重。喜歡比什麼都重要。)

陣雨 8月25日 星期六  

今日踢左一場精彩嘅球賽,雖然我入唔到波,但係有幾次強勁嘅進攻我都有份,有一腳差少少就中門,可惜右邊身比敵人壓住,一時之間轉唔到身,响左邊門柱出界,之後我地慢慢咁沉著應戰,最終大勝四比零,Yeah!!!

我原本都冇諗過再踢返波,以前小學同中學都有玩下,之後再與足球冇緣了......讀完書出嚟淨係掛住做嘢,跟本都冇心想去踢波,一直咁七年就過去喇,加入其士工程之後,一大班同事都係好波之人,起初只係想識多幾個新朋友先跟埋去,踢多左幾次之後,我又開始熱愛"我的足球"了~

後記: The best mind-altering drug is the truth. (真相是最能改變心智的藥劑。)

陣雨轉多雲 8月24日 星期五  

近排可謂不停咁睇戲,差不多睇左成十套電影咁滯,有d我都唔記得喇,最記得當然就係剛剛先至睇完嘅《不能說的秘密》,因為係同一個女仔單獨去睇,所以特別有feel......跟住就係唔多好睇嘅《火併時速3》,成龍已經out哂day,套戲仲一味講埋哂d唔好笑嘅鬼佬對白,但無奈地仲有老友係佢嘅忠實粉絲,迫住要硬食......之後就係《導火線》,我一向都唔多睇好港產片,因為當日同成大班朋友去BBQ,燒完嘢食之後點都要比面去睇,睇完之後發覺又幾得喎,奪命較剪腳重出江湖喇......而最好睇當然就係《變形金剛》啦,跟本無需多講廢話,只要入場睇完之後,就知我唔係講大話喇......其他電影仲包括有《五星級大鼠》...《阿森一族大電影》...《哈利波特5》......記得嘅就係咁多,嚟緊我會欣賞其他舊電影,到時再分享啦~

後記: I have enjoyed life a lot more by saying yes than by saying no. (說「好」使我所得的快樂，遠比說「不好」為多。)

處暑 8月23日 星期四  

可怒也>>>>>>今朝返到公司就比人追數,追返尋日lunch餐茶錢,豈有此理......我唔係唔想比,而係唔低(貴到離哂大譜),十二個人去食,其中四件生日蛋散唔使計(應該計埋我架),除返開之後竟然要比成舊水喎,咁餐茶咪成千幾銀,又唔係食左好多嘢喎,今個月已經大大大出血喇,諗住下個禮拜就出糧,唔就使成日都咁縮骨啦,點知有時唔應使嘅錢點都要使,諗住今個禮拜六約個新朋友去食吓飯,keep住聯絡先至唔會忘記大家,今日竟然將我嘅美夢粉碎哂,眼見成舊水就咁就飛左去,真係唔傷心都肉痛啦~

後記: 愛因斯坦不重視個人的社交，這樣，他就可以全心和整個世界交往。

陣雨 8月22日 星期三  

估唔到原來八月份生日嘅人有好多(我認識的),今日公司有十幾人一齊去酒樓飲茶,係為左慶祝四個就快生日嘅同事,當然冇人知道我係八月二十號生日啦,咁我都好高興同為八月生日嘅同事慶祝,當係為自己慶祝而慶祝啦! 諗返起原來舊舊公司都有一位同事,佢嘅生日都就快到,幾年前舊舊公司一直都有搞生日party,我離開之後當然再冇搞啦,不過connie姐& Hurley小姐都仲記得我生日,佢地幾唔得閒都send個sms比我,多謝多謝各位好朋友為我慶祝生日呀~

後記: 疼痛由腦部產生，用來防止憤怒發作，目的是保護你，以疼痛引開你的注意力。

陣雨 8月21日 星期二  

尋晚一早就收工返屋企,話哂都係自己嘅牛一喎,點都比返少少幸福感過自己啦,因為我一向都對自己好好,唔係話我對其他唔好喎,只係對其他好嘅時候,同時都要對自己好一點,說實在......除左我媽咪之外,都好難再搵到其他人真心咁對我好,我冇其他男人咁好彩,及早搵到一個對自己好嘅愛人,唯有自己對自己好D囉! 過完一個好平靜好平淡嘅生日之後,工作依舊工作,休息依舊休息,嚟到今晚終於都等到肥雞晚餐嘅出現,其實我仲以為係正日有得食,點知冇口福呀......遲總好過冇啦,不過隻雞真係好好食~

後記: 你忙，他忙，我忙，大家都沒閒著。日程表密密麻麻，大家有沒有機會靜下來，想想自己究竟在忙什麼？